MANMAN PA M, MANMAN PA W, MANMAN NOU

Yon manyè jeneral daprelwa natirèl ak disposzisyon biyolojik ki egziste, chak moun ki fèt sou latè gen yon orijin familyal, sa ki vle di gen yon manman, yon sous matènite ki fè l, se sak fè lè n ap pale de sous sila swa nan rapòte yon fè, nan fè lwanj oubyen plis esplike yon istwa sitou nan langaj nou pa bò isit, nou toujou pale konsa " manman pa m, manman w, manman pa nou" ;  sa ki esplike klè kou dlo kokoye pawòl anvan yo. Men se toujou nan menm liye sa tou, chak moun sou latè gen yon fason pwòp yo wè manman pa yo, e tout sa depann de kantite mizè moun sila te andire ak li depi toupiti, epi jan moun sa trete l tou. 

Nan sosyete pa nou, manman yo se pi souvan madan sara gwosis ou detayan, sèvant kay madanm, fanm dèyè biwo, chofè elatriye. Nou chak pa bò isit gen yon kondisyon espesifik, yon sitiyasyon manman nou te chwazi brave pou l leve nou. Nenpòt jan sa ye, bon tan kou move tan fòk li soti pran lari pou l rantre ak yon kichòy.

Anpil fwa, yo konn gen youn, de, oubyen plizyè pitit san papa sou reskonsabilite yo.  Fanm sila yo toujou ap bat tèt yo kou mèt Janjak pou leve pitit yo, nan dòmi nan machin, dòmi sou do kamyon nan fredi, pran move betiz ak malonèt nan men moun chak jou Bondye mete, sa rive tou anpil nan yo sibi maltrèt ak tout lòt vye zak malonèt. Epi anpil fwa tou, pitit yo gen abitid fè sa ki pa fè kè yo kontan, pou kòlè ak move san tiye yo.

Konsa tou, anpil nan yo konn andikape, sa ki konn fè yo parèt envisib san valè nan fanmi yo oubyen plis nan peyi isit. Menm pitit yo konn rive minimize yo, abandone yo tou, sa ki fè timoun sa parèt engra anvè manman li. 

Anmenmtan tou, yo konn di yo se reskonsab anpil move zak jèn ap komèt jounen jodi a nan sosyete a, nan sitirans yo te konn bay, sa yon pakèt moun rele manman sansib oubyen tou manman kè nan men.

Manman pa m gen karakteristik pa l ki fè l bon pou mwen, manman pa w gen karakteristik ou renmen lakay li ki atire w renmen l plis toujou, se sak fè nou tout pa jan m gen menm pwojè pou manman nou.

Rich kou pòv,  nwa kou milat, cheve grenn kou swa, manman pa m ap toujou diferan de pa w, men sa p ap anpeche yo pote menm sounon jeneral sa ki se "manman".  Ak kado, san kado, nou tout nan fason pa nou toujou fete manman pe enpòt sa ki te ka rive, manman pa m ak pa w ap toujou rete manman. 

Anfen, chak moun gen manman pa yo, chak moun gen yon jan yo wè manman yo, rich kou pòv, nwa kou grimèl, kout kou wo, gwo kou mèg. Nou tout toujou gen yon apresyasyon espesyal pou li. Andikape ou pa yo toujou rete manman. Valorize l, renmen l, pale de li, ede l toutotan ou ka fè sa piske ou pa janm konn jou lavi ap bout ak nou. Moutre l li enpòtan, se nimewo 1 nan tout bagay. E se pa pou san rezon y ap plede chante tout tan yon moso manman se yon moso ki chè. Malgre sa ki egziste swa bò manman pa m, pa w, yo tout se manman.

Tèks sa ak videyo sila se pou madame TELUSCA 💖💖💖

Otè :  Christina J.VILMÉ.

Tèks 5, espesyalite fèt manman

extensivepressehaiti@gmail.com