ENPÒTANS MANMAN GENYEN

Otè :  Mikenson MERZIL

Yon fason jeneral, depi mond la te fin kreye, yo  rele manman sila ki bay nesans a yon lòt kreyati ki sanble ak li sou baz espesifik. Kreyati sila a plis sosyete yo t ap evolye nan kat kwen latè te fini pa enspire lèzòm enpòtans ak nesesite pou chwazi yon moman nan chak ane pou onore yo.

Nan kilti ayisyen an, se toujou dènye dimanch nan mwa me yo fete fèt sila a kote tout pitit pran plezi pou bay manman yo yon atansyon anplis nan lide pou pwouve l ak fè l santi enpòtans li genyen nan lavi yo chak, kijan kontribisyon l itil nan fè de yo sa yo rive ye nan lavi ak sa yo ka ye demen, men nan peyi tankou Etazini ak Kanada se dezyèm dimanch yo selebre gwo fèt sa a.

Yon moun espesyal, yon moun enpòtan, youn ki pa menm jan ak tout lòt moun, yon manman jan gwoup Zenglen an di l  : "se reprezantan letènèl sou latè" si nou konsidere aspè kote se yo ki ansent, pote chak pitit nan vant pandan 9 mwa avan pou l akouche bay nesans ak youn ou plizyè pitit. Nan kilti pa nou, anpil manman bay pitit yo manje apre 6 mwa nesans epi pou l kontinye ba l tete jiska 24 mwa, lontan yo te konn di se lèt manman ki bay timoun fòs. 

Manman se moun ki toujou pi sansib nan fanmi an, se pa moun k ap abandone pitit li konsa-konsa, se la ti pawòl "manman sèten..." an jwenn bon sans li. Se moun avan tikrik-tikrak zantray li te gentan ap rache, pou l gen fòs fòk kòd nan ren l mare sèt ne pou l sa kontinye jwe wòl bèje li. Se moun ki toujou pi prezan lè pitit li gen pwoblèm, li p ap pè soufri pou pitit li ka byen, menm si l grangou depi pitit li konble li satisfè. Genyen ki pran gwo inisyativ tankou fè lesiv, travay kay moun, fè komès leve bonè dòmi ta elatriye pou jwenn kichòy pou pote nan kay anba kout imilyasyon ak desepsyon, anba bouch sila ki panse l pi wo paske l gen ti mwayen. Sitou pou sila ki alafwa jwe wòl ni manman, ni papa yo. Kategori sa merite pou tout sosyete a ta retire chapo devan l pou jan okipasyon pitit nan yon sosyete tankou Ayiti se pa ti bagay piti. 

Manman senbolize lanmou, se moun ki bay direksyon an, se tou moun ki gen plis pasyans sitou nan met manje nan bouch ak souke fè dodo. Se pa moun k ap kite pitit li ap soufri devan je l. Se moun menm si l nan fon somèy li gen yon je ouvri sou pitit li, yon premye rèl sifi pou l reveye. Li se pi souvan moun ki pase plis tan nan kay la. Pa fwa menm si l fè gwo bri, pa enkyete w "manman poul pa janm beke pitit li jouk nan zo" se jis malè l ap evite. Ou poko janm wè anyen si w poko wè yon fanm kap lave oubyen okipe kepòt lòt tach ak pitit li sou bra l, sou janm li, oubyen koke nan do l.

Yon manman se yon moun tankou tout moun men ki gen yon enpòtans espesyal, se li k bay li, li se lanmou, kè kontan ak tout sa moun ta ka konsidere kòm pi chè. Se moun ki merite anpil respè, lanmou, onè ak pwoteksyon. Poukisa se yon grenn jou pa ane yo fete manman? Ki kote lide fèt sila a soti? Poukisa tout peyi pa fete l menm jou ?

Tèks ak videyo sila dedye ak madam Nacilia Dimanche 💖💖😘😘

Otè :  Mikenson MERZIL

Tèks1 espesyalite fèt manman

extensivepressehaiti.com